Voetbal

Fotografie: Wil Hüsken en Hans Loonen

't Thema van dit kwartaal is voetbal en göt ovver d'n derby tusse Loën en Baek. 't  Bòttert nie zó tusse Loën en Baek. Dè het 't naoit gedaon en zal ok wel naoit gón gebeure. Nie dè dor 'n echte reeje vör is, mar 't is ònderhând wel traditie geworre. Voetbal is zó'n moment dè de competitie tusse beije staerk nor veur kumt en d'r van alles án gedaon wört um te winne of mekaar in ieder geval de loef af te staeke. Zówel òp 't veld as dor buute. Dizze tekst is ierder gepublicierd ien d'n Huiwage van 2010 en is geschreve dör Piet Beurskens.

Papa’s zien stòm en derre ok

Ik kòs d’r nie van slaope en heb oneindig veul schöpkes geteld die waek. ‘t Was echt hiël aerg. De duopenotti wor ik normaal zó gek op bin smakte zelfs anders.  ‘t Was prachtig waer, druëg, en volges òns mam hóst 20 graode. Ik moog miene stoere zòmmerjas nog án en mien favoriete gruûn bòks.

Gael/zwart
Toen ik al aachter beej pap ien d’n auto zaat, gaaf zeej meej de gael/zwarte sjaal nog án. Die was ik ien de stress hiëlemól vergaete. Dor ginge we hin. ‘n Bitje án de late kânt, mar ik moog vör ‘t urst mit ònze pap nor ‘n voetbalwedstrijd en nie zoëmar ‘n wedstrijd, ‘t was Baek tegge Loën. Ònze pap noemde ‘t steeds de kwaoje tegge de goeie en gelukkig huurde weej beej de goeie.

Dörjage
‘t Was kei druk, Ruben van groep 7 was d’r ok. Zien vader het ‘nen hiëlen dikke buuk en as ‘t raegende kòs Ruben dor ônder gón schuule. Onze pap ging beej Huub, Jeu en Theo staon en ik moog beej um òp de nek. ‘t Vuurwaerk deuj pien án mien oere, mar was vet gaaf. Jeu haj verstând van voetbal, want die prótte ‘t maest en maej kwaam d’r dan ‘n bitje speej uut ziene mônd, wá klaene vlekskes wiere òp de roëje jas van Huub. Volges Huub was Paul d’n baeste en de nummer 4 van Baek gen kloëte werd. Ònze pap mende dè ze mier mòsse dörjage, mar dè zaej ien d’n auto òp d’n hinweg ok al. Òp ‘n gegaeve moment stöt miene favoriet Wout iëne kier vreej vör de goal en schiet ie um d’r ien. Ik mòs ònze Pap goêd vâsthâlde want ik stuuterde hóst van ziene nek af. Theo ziene bril viel òp de grônd en Huub zien stinksigaar dânste vör mien oëge. Jeu haj ‘t ovver gerechtigheid, Duitsers en d’r òp en d’r aover.

Glaeske Ranja
Iemand riep 10 10 10, mischien zaat d’r ok wel ‘n glaeske ranja vör meej beej dan. ‘t Was räöst en ik moog efkes òp aege biën staon. Theo ging koffie hale en ònze Pap deuj wer net of ie gen geld beej zich haj, mar ik zaag goêd zien portemonneej ien de tes zitte. De jas van Huub was al aardig vòchtig. Jeu bleef mar án ‘t praote en vöral de minse mit de roëd witte dasse keke um maej kwaod án.

Efkes kiêke
Op ‘n gegaeve moment begon iederiën te joele. Ik trok pap án de jas en vroêg of ik wer òp de nek moog, mar heej luusterde nie. Ik zaag hiëlemól niks, keek nor baove en zaag Theo rare snelle tòngbewaeginge make en ‘t koffiebekerke razelde ien zien hând. Jeu was sprakeloos en Huub zoog uut alle macht án zien sigaar. Ik riêp “lót meej ok efkes kiêke dan” mar pap hiêl trillend zien hând vör mien oëge. ‘t Duurde hiël lang, wel drie minute of zoë. Huurde Jeu op ‘n gegaeve moment zegge det ‘t hòbbelige veld ok zien moie kânte haj. Theo mende det de linkse grótter was dan de rechse en Huub vônd ‘t zund det ze ur zus nie mitgenome haj. Ik bleef mar trekke án de jas van ònze pap en uuteindelek moog ik wer òp ziene nek, de twedde helft ging wer beginne.

Naks
‘t was meej duidelek dè ik wá gemist haj ien de räöst. Stan paerde d’r nog ennen ien: 0-2, de wedstrijd was gedaon. Op schól huurde ik ‘s móndags van Ruben det ’r ‘n bloëte der ovver ‘t veld haj gerend en det ziene pap d’r foto’s van gemakt haj mit zien I-phone. Ik snapte nie wörum ònze pap en die ândere zó raar dorovver hán gedaon. As mam naks dör ‘t huus löpt kiekt ònze pap nog nie um. Derre zien stòm en papa’s nou ok vort.